Հարկային ստուգումների և ակտի մասին

Հարգելի Դավիթ, օրինակները շատ են.
Պատկերացրեք, որ սահմանված կարգով հաշվապահական հաշվառում չեք վարում, որի հետևանքով հաշվետվություններ չեք ներկայացնում կամ ներկայացնում եք սահմանված կարգի խախտումներով, օրինակ ԱԱՀ-ի հաշվարկը: Ենթադրենք պետք է ներկայացնեիք ԱԱՀ-ի հաշվարկ, որով պետք է արտացոլվեր Կազմակերպության կողմից ներկա պարտքը բյուջեյին 500 հազ. ՀՀ դրամ, սակայն այն չեք ներկայացրել և չեք վճարել այն:
Հարկերի մասին օրենքի համաձայն կենթարկվեք հետևյալ պատասխանատվությանը.
27 հոդված` գանձվում է թաքցված կամ պակաս ցույց տրված հարկվող օբյեկտի համար նախատեսված (հարկային տեսչության կողմից հաշվարկված) հարկի գումարը, ինչպես նաև տուգանք` այդ գումարի 50 տոկոսի չափով, իսկ հարկային տեսչության կողմից խախտումն արձանագրվելուց հետո մեկ տարվա ընթացքում նույն հարկատեսակի գծով հարկվող օբյեկտը կրկին թաքցնելու կամ պակաս ցույց տալու դեպքում` տուգանք` հարկի ամբողջ գումարի չափով , այսինքն կգանձվի 500 հազ. դրամը + 250 հազ. դրամ տուգանք առաջին անգամ, իսկ 1 տարվա ընթացքում կրկնելու դեպքում տուգանքը կկազմի 500 հազ. դրամ:
25 հոդված`այդ խախտումների հետևանքով բյուջե չմուծված կամ պակաս մուծված հարկերի գումարի 10 տոկոսի չափով: Այսինքն 50 հազ. դրամ:
Այդ տուգանքներից հետո Ձեր պարտավորությունը կկազմի բյուջեի հանդեպ 1-ին անգամ 500 հազ./հարկի գումարը/+250 հազ./տուգանք 27-հոդվ./+50 հազ. /տուգանք 25-հոդվ./= 800 հազ. ՀՀ դրամ: 1 տարվա մեջ կրկնելու դեպքում 500 հազ./հարկի գումարը/+500 հազ./տուգանք 27-հոդվ./+50 հազ. /տուգանք 25-հոդվ./= 1050 հազ. ՀՀ դրամ
Ի դեպ այս տուգանքները վերաբերվում են բոլոր հարկատեսակների գծով չներկայացված կամ խախտումներով ներկայացված հաշվետվություններին և չմուծված գումարներին: