Գայանե․

Բարև Ձեզ, կօգնե՞ք խնդրեմ.

Կազմակերպությունը աշխատում է ԱԱՀ-ի դաշտում: Հունվարի 26-ին ծառայությունների մատուցման հարկային հաշիվ են դուրս գրել դեկտեմբեր ամսվա համար: Ես այդ գումարը հունվա՞ր ամսվա հաշվետվության մեջ եմ ներառելու։

Աննա․

Հարգելի հաշվապահներ, կասե՞ք՝ շրջանառության հարկով աշխատող ՍՊԸ ցանկանում է իրականացնել տեխզննման գործունեություն։ Ի՞նչ հարկեր և վճարներ պետք է վճարի: Կանխավ շնորհակալություն։

Մերի․

Ողջույն, հաշվապահներ ջան։ Կենդանիների կերերի խանութի հաշվապահությունը վարելու առանձնահատկություններ կա՞ն, և արդյո՞ք պարտադիր է ծրագրով աշխատելը փոքր խանութի պարագայում, երբ 24 մլն չի գերազանցել։

Լիանա․

Բարև ձեզ, 2023 թվականի դեկտեմբերի 1-ից հետո ինչպե՞ս պետք է գրանցվեն վարձով բնակարանները։ Ու՞ր պետք է դիմել վարձով բնակարանը գրանցելու համար, ի՞նչ փաստաթղթեր ներկայացնել, և եկամտային հարկը ավտոմատ կհանվի՞ վարձավճարից, թե՞ պետք է տան սեփականատերը վճարի։

Խաչատուր․

Բարև ձեզ։ Մոտոցիկլ եմ ուզում վարձույթով տամ, որքա՞ն հարկեր եմ վճարելու, ու ինչ է պետք անել ընդհանրապես որպես ԱՁ գրանցվելու համար և այլն, կմանրամասնե՞ք, եթե դժվար չէ։ Ամեն մոտոցիկլը 5 000 դրամով վարձով եմ տալու, ու ի՞նչ պետք է անեմ այդ դեպքում։ Շնորհակալություն։

Ժասմեն․

Ժամավճարով աշխատող դասախոսի դեկտեմբերի աշխատավարձը կազմում է 655 դրամ: Ո՞վ է վճարելու դրոշմանիշային վճարը:

Մարիամ․

Բարև Ձեզ, հարգելի հաշվապահներ, խնդրում եմ տեղեկացնել ինձ․ էլեկտրոնային դրամարկղային գրքերի մասով, ընդունենք հունվարի համար, ե՞րբ է վերջնաժամկետը լրացնելու, և ի՞նչ ժամանակաշրջանի համար կարող ենք խմբագրել։

Մանե․

Բարև Ձեզ։ Ցանկանում եմ բացել լեզվի կենտրոն, որի ընդունելությունը լինելու է 5 տարեկանից, լինելու է շաբաթական 2-3 օր 1.5-2 ժամով անգլերենի ուսուցում։ Հարկայինում գրանցվելու ենք որպես ԱՁ, ունեմ նաև համապատասխան բարձրագույն կրթություն։ Հարց՝ Նախարարությունից ինձ լիցենզիա պե՞տք է։ Եվս մեկ անգամ շեշտեմ, որ սա զարգացման կենտրոն չի, այլ լեզվի կենտրոն 5 տարեկան և բարձր տարիքի անձանց համար։ Նախապես շնորհակալություն։

Գայանե․

Բարև Ձեզ։ Եթե իրական շահառուի հայտարարագիրը նախորդ տարվանը վերահանձնել տվեցի, բայց շահառուի անձնագրի տվյալը փոխվել է, ինչպե՞ս կարող եմ չեղարկել, որպեսզի ճիշտը ուղարկեմ, շնորհակալություն։

Ջուլիա․

Բարև ձեզ, հարգելի հաշվապահներ։ Ա/Ձ-ն զբաղվում է թափոնների վերամշակմամբ և որպես երկրորդային հումք վաճառում է, գործունեությունը իրականացնում է միկրոյի դաշտում։ Արդյո՞ք կա այնպիսի օրենքի հղում, որ ազատված է հարկերից տվյալ գործունեության տեսակը։

Եվա․

Բարև Ձեզ։ Կասե՞ք՝ ֆիզ․ անձանց եկամտի հայտարարագրման մասով ի՞նչ հաշվետվություն պետք է ուղարկել։ Ի՞նչ ժամկետում։ Եվ չներկայացնելը ի՞նչ հետևանքներ կունենա։ Եվ ֆիզ․ անձանց ՀՎՀՀ ինչպե՞ս կարող ենք վերցնել, եթե ֆիզ անձը ՀՀ-ում չէ։

Արմինե․

Բարև Ձեզ, հարգելի մասնագետներ։ Կխնդրեի պատասխանել.

Շրջհարկի դաշտում գործող ԱՁ եմ։ Արտադրամասը՝ համաձայն գրավոր պայմանագրի, վարձակալել եմ ռեզիդենտ ֆիզ անձից։ Հարցերս հետևյալն են․

Հարց 1․ Վարձավճարի եկամտային հարկը ԱՁ-ն պետք է հաշվարկի և փոխանցի բյուջե՝ այն ցույց տալով եկամտային հաշվետվության համապատասխան տողում, թե՞ քաղաքացի ֆիզ անձը հաշվառվի ՊԵԿ-ում և հայտարարգրի հիման վրա կատարվի փոխանցումը։

Հարց 2. Քանի, որ շրջհարկով եմ աշխատում, և վարձակալական վճարը ԱՁ-ի համար ծախս չի (այսինքն չի պակասեցվելու շրջհարկից), պարտադի՞ր է կադաստրում հաշվառվելը կամ նոտարական վավերացումը։

Աննա․

Բարև ձեզ։

Կարո՞ղ եք ինձ օգնել՝ ի՞նչ անել, եթե տնօրենն եմ և ուզում եմ ազատվել աշխատանքից, իսկ հիմնադիր տնօրենը չի ստորագրում իմ դիմումի տակ և նոր տնօրեն չի բերում։

Գիտեմ, որ հարկավոր է պետռեգիստրից հանել և նորին գրանցել հիմնադիրի հրամանի համաձայն, կատարել վերջնահաշվարկ և հարկայինից հանում։ Սակայն հիմնադիրը չի տալիս հրաման, և բացի դատարան դիմելուց ինչպե՞ս կարող եմ ես ազատվել աշխատանքից։

Ելենա․

Բարև ձեզ: Կազմակերպությունը (ՍՊԸ) աշխատում է շրջանառության հարկով: Ապահովագրական կազմակերպությունից ստացել է ԱՊՊԱ հատուցում 20 000դր․։ Այդ գումարը արդյո՞ք պետք է հարկվի շրջանառության հարկով։

Հարգելի գործընկերներ, 2024թ. փետրվարի 1-ը միկրոձեռնարկատիրության սուբյեկտի՝ 2023թ․ իրացման շրջանառության վերաբերյալ հաշվետվության ներկայացման վերջնաժամկետն է։ Պետք է հանձնել ձև N 256. “Հաշվետվություն միկրոձեռնարկատիրության սուբյեկտի իրացման շրջանառության վերաբերյալ”:

ՀՀ Հարկային օրենսգիրք, Հոդված 270. Միկրոձեռնարկատիրության սուբյեկտների կողմից հարկային հաշվարկներ ներկայացնելը․

Միկրոձեռնարկատիրության սուբյեկտ համարվող ռեզիդենտ առևտրային կազմակերպությունները և անհատ ձեռնարկատերերը (բացառությամբ բացառապես Օրենսգրքի բաղկացուցիչ մասը կազմող հավելված 3-ով սահմանված գործունեության տեսակների մասով միկրոձեռնարկատիրության սուբյեկտ համարվող անհատ ձեռնարկատերերի) մինչև հարկային տարվան հաջորդող հարկային տարվա փետրվարի 1-ը ներառյալ Օրենսգրքի 53-րդ հոդվածով սահմանված կարգով հարկային մարմին են ներկայացնում հաշվետվություն` նախորդ հարկային տարվա ընթացքում գործունեության բոլոր տեսակների մասով իրացման շրջանառության վերաբերյալ:

Գոռ․

Բարև Ձեզ։ Կուտակային կենսաթոշակների մասին օրենքում չե՞ն ներառվում միկրոձեռնակատերերը։

Հայկ․

Հարգելի կոլեգաներ, ընկերությունը ներքին հրամանով աշխատանքային տարվա և օրվա սկիզբ է համարել 2024թ հունվարի 8-ը, աշխատողը ներկայացրել է անաշխատունակության թերթիկ՝ 02․01․2024-08․01․2024 ժամանակահարվածի համար։ Հարցս հետևյալն է՝ վճարելու՞ են արդյոք այդ օրերի համար, քանի որ կառավորության որոշումով աշխատանքային օրերի սկիզբ է մարվում ամսի 8-ը։

Աշոտ․

Բարեվ ձեզ։ Կասե՞ք, թե ինչպե՞ս վճարել վարձակալությունից ստացված եկամտից առաջացող եկամտային հարկը (10%)՝ ապրելով արտասահմանում։ Ունեմ ՀՀՎՀ, ասում են՝ ինչ որ Էլեկտրոնային համակարգի միջոցով է արվում, սակայն չեն մանրամասնում, թե ինչպես։ Շնորհակալ եմ։

Ընկերություն՝ ՎԻ-ԴԻ-ԷՅ ԴԱՅՄՈՆԴՍ ՍՊԸ
Հասցե՝ ՀՀ, Կոտայքի մարզ, Ք. Աբովյան, Էդ. Պետրոսյան 16/1
Հեռախոս՝ 077093491
Էլ․ փոստ՝ vda.info@vdadiamonds.com
Թափուր աշխատատեղ՝ Գլխավոր հաշվապահ
Աշխատանքի նկարագրություն՝

– Ապահովել հաշվապահական հաշվառման վարումը, հաշվետվությունների ժամանակին կազմումն ու համապատասխան մարմիններին: ներկայացումը՝ գործող օրենսդրության պահանջներին համապատասխան:
– Կոորդինացնել հաշվապահա-ֆինանսական ընթացակարգերը և ընդհանուր հաշվապահական համակարգը:
– Ապահովել ընկերության ֆինանսական հոսքերի կառավարումը:
– Ձևակերպել և վերահսկել բանկային գործարքները:
– Հետևել հաշվապահական և ֆինանսահարկային օրենսդրության փոփոխություններին, ինչպես նաև աշխատանքային օրենսդրության փոփոոխություններին:
– Պատրաստել հրապարակման ենթակա ֆինանսական հաշվետվությունները:

Պահանջներ՝

– Բարձրագույն կրթություն ֆինանսական կամ տնտեսագիտական ոլորտում,
– Նվազագույնը 5 տարվա աշխատանքային փորձ
– Հաշվապահական ծրագրերի, ինչպես նաև MS Office փաթեթի իմացություն
– ՀՀ հարկային և աշխատանքային օրենսգրքերի գերազանց իմացություն
– Կառավարման, պլանավորման և կազմակերպչական հմտություններ
– Հայերենի, ռուսերենի, անգլերենի իմացություն:
Աշխատավարձ՝ Կախված հմտություններից
Այլ նշումներ՝ Ռեզյումեներն ուղարկել անգլերեն և հայերեն։

Նարե․

Բարև Ձեզ։ Հարգելի հաշվապահներ, խնդրում եմ պատասխանել վարձակալության հետ կապված մի քանի հարցի`

1. Եթե ԱԱՀ-ով աշխատող ՍՊԸ-ն տարածք վարձակալի շրջ. հարկով աշխատող ՍՊԸ-ից, ապա իր մոտ հարկային պարտավորություններ չի առաջանա չէ՞, միայն ստացված հաշիվ վավերագրի գումարը պետք է ներառել ԱԱՀ հաշվարկի մեջ` որպես ՀՀ տարածքում ստացված ծառայություն։

2. Վերոնշյալ դեպքում վարձակալության պայմանագիրը պե՞տք է հաստատվի կադաստրում, և վարձավճարի նվազագույն չափը պե՞տք է լինի կադաստրային արժեքի 2,5%-ից ոչ պակաս` տարվա կտրվածքով։

3. Եթե շրջ. հարկով աշխատող ՍՊԸ-ի տարածքը հիմնադիր-տնօրենի սեփական տարածքն է և ՍՊԸ-ին տրված է անհատույց, ապա պե՞տք է տնօրենի` որպես ֆիզ. անձի հետ կնքվի անհատույց վարձակալության պայմանագիր, իսկ տնօրենն էլ ուղղակի պե՞տք է հարկայինում հայտարարություն ներկայացնի, որ տարածքը տրամադրել է անհատույց հիմունքներով։

Անի․

Բարև ձեզ, հարգելի մասնագետներ։ Խնդրում եմ օգնել. դեկտեմբեր ամսին հարկային հաշիվ ենք գրել ապրանքի մատակարարման, այսօր պարզվել է, որ չափման միավորը սխալ է գրվել, պետք է լիներ լիտր, ոչ թե՝ հատ: Հարց. կարո՞ղ ենք արդյոք ճշգրտել հաշիվը՝ մատակարարման օրը թողնելով դեկտեմբեր ամսին դուրս գրման օրը: Նախապես շնորհակալ եմ։

Inna.

Ողջույն, այսպիսի մի հարց․

Եթե ֆիզիկական անձը ստանում է քարտային փոխանցում արտասահմանյան app-ի միջոցով, արտասահմանում աշխատող հարազատից, արդյո՞ք հարկ պետք է վճարի։ Կախվա՞ծ է դա գումարի չափից, թե՞ ոչ։ Շնորհակալություն։

Եվա․

Խնդրում եմ կասե՞ք՝ եթե կազմակերպությունը զբաղվելու է արտադրությամբ և ձեռքբերումների մեծ մասը անելու է շուկայից, այսինքն հաշիվ չի ստանալու, այդ դեպքում 2025թ-ից շրջանառության հարկի դաշտում աշխատելու դեպքում կհարկվի ձեռքբերման գնից, թե՞ միայն ապրանքների առք ու վաճառքի դեպքում է դա։

Լիլի․

Բարև Ձեզ: Խնդրում եմ օգնել հետևյալ հարցում․

Հանրակրթական դպրոցում հերթափոխով աշխատող պահակը տոնական օրերին արդյո՞ք կրկնակի պետք է վարձատրվի, և եթե այո, ապա հաշվարկն ինչպե՞ս է արվում։ Տոնական ժամերի մեջ կան նաև գիշերային ժամեր, որի համար 30 տոկոս է տրվում հավելում: Շնորհակալություն:

Միքայել․

Բարև Ձեզ, հարգելի գործընկերներ։ Մի քանի հարց ունեմ․

– Արդյո՞ք ճիշտ եմ հասկանում, որ ՍՊԸ բացելուց հնարավոր է ընտրել G46.4 Տնտեսական գործունեության դասակարգիչը։ Ի նկատի ունեմ՝ պարտադիր չէ ավելի կոնկրետ կոդ ընտրել (օրինակ G46.4x կամ G46.4x.x)։

– ՍՊԸ բանկային հաշիվը ՍՊԸ գրանցելուց ինչքա՞ն ժամանակ հետո պետք է բացել։

– Ի՞նչ եղանակով է կանոնադրական կապիտալի գումարը նստում ՍՊԸ հաշվին։ Ի՞նչ պետք է անի ՍՊԸ դրա համար։

– Կարո՞ղ է արդյոք ՍՊԸ հիմնադիրը անտոկոս վարկ տալ ՍՊԸ-ին, որպեսզի Հիմնադրի մոտ անիմաստ շահութահարկ չստեղծվի վարկը վերադարձնելիս։

Լուսինե․

Բարև Ձեզ։ Խնդրում եմ օգնել հասկանալ հետևյալ նրբությունը։ Դեռևս 2020 թվականից գրանցված եմ որպես ֆիզ անձ, միկրոձեռնարկատեր։ Բնակարանը որպես հյուրատուն եմ շահագործում։ Ամեն տարի հանձնել եմ հաշվետվություն ԱՁ չհանդիսանալու վերաբերյալ, նշելով 13-րդ կետը՝ զբոսաշրջային տների միջոցով հյուրանոցային ծառայությունների մատուցում։ Արդյո՞ք հիմա պետք է այլ հաշվետվություն հանձնեմ, և ի՞նչ նրբություններ և փոփոխություններ կան։ Կանխավ շնորհակալություն։

Նարինե․

Հարգելի հաշվապահներ, ՏՏ ոլորտի նորաստեղծ ԱՁ-ն շրջանառության հարկի ոլորտում է: Պետք է ծառայություն մատուցի արտասահմանում գնտվող ՀՀ քաղաքացու: Համագործակցությունն կարող է կրել շարունակական բնույթ, այսինքն աշխատավարձի պես ամեն ամիս ֆիքսված գումար փոխանցվի ՀՀ-ից:

Այս դեպքում հաշիվ վավերագիր դուրս գրելն պատվիրատու ֆիզ. անձի անձնագրային տվյալներով բավարա՞ր է: Արդյո՞ք պայմանագիր էլ է պետք: Քանի որ թղթային ստորագելու տարբերակ չկա, ինպե՞ս կարելի է կնքել:

Արտավազդ․

Բարև ձեզ։ ԱՁ-Ն աշխատում է շրջանառության հարկի դաշտում, գնում է հեռակառավարվող դարպասներ և մեծածախ վաճառք իրականացնում, խնդրում եմ օգնեք՝ ո՞ր տնտեսական դասակարգիչը ճիշտ կլինի օգտագործել այս դեպքում, նախապես շնորհակալ եմ։

Դիանա․

Բարև Ձեզ, հարգելի հաշվապահներ, խնդրում եմ պատասխանեք՝ Ձև 163 – ի փոխարեն ո՞ր ձևն ենք ներկայացնելու ՊԵԿ: Շնորհակալություն։

Նարեկ․

Բարև Ձեզ։ Ընկերության աշխատակիցը դուրս է եկել աշխատանքից 3 ամիս առաջ, բայց աշխատանքի ազատման հայտ չենք ներկայացրել։ Կասե՞ք՝ ի՞նչ անել, որ մինիմալ ռիսկային լինել։ Ազատման հայտ ուղարկեմ 3 օր հետին ամսաթվով և ճշգրտեմ եկամտային հարկի հաշվետվությունները աշխատակցի աշխատավարձը զրո գրելով, թե՞ երեք ամիս հետին ամսաթվով ազատեմ աշխատակցին՝ ճշգրտելով նաև եկամտային հարկի հաշվետվությունները՝ աշխատակցի աշխատավարձը զրո գրելով։

Արմեն․

Բարև Ձեզ։ Ի՞նչ հարկային վճարներ կան 93.29.2 կետով աշխատող միկրոձեռնարկատերերի համար։ Դա բիլիարդի և թենիսի խաղերի կազմակերպման գործունեություն է։ Պարտադրում են ունենալ ՀԴՄ, բայց տարածքը ավտոմատացված է, և մարդ չի լինելու էնտեղ աշխատող, որ ՀԴՄ կտրոն տպի։

Կարեն․

Բարև Ձեզ։ Խնդրում եմ ասեք՝ արդյո՞ք նախկինում ամեն ամիս ստացված հավելավճարները հաշվի են առնվում արձակուրդայինի գումարը հաշվարկելիս։

Արմեն․

Գիտական աստիճանի համար տրվող հավելավճարը արդյո՞ք հարկվում է, եթե այո, ապա ի՞նչ կարգով։

Մարի․

Հարգելի հաշվապահներ, ինձ շտապ հարկավոր է ռուսերեն և անգլերեն ինվոյսի օրինակներ։ Խնդրում եմ zenfira.muradyan@bk.ru -ին ուղարկել ։ Շատ մեծ օգնություն կլիներ։ Նախապես շնորհակալություն։

Մարի․

Հարգելի հաշվապահներ, կարո՞ղ եք ասել՝ սրանք Հայաստանում ո՞ր տվյալներն են, կամ որո՞նք կլինեն սրանց փոխարինող/համարժեք․

– КПП
– ОКВЭД
– ОКПО
– ОКТМО
– ОКАТО

Գնել․

Ցանկանում եմ, որ իմ ԱՁ-ն կնիք ունենա։ Արդյո՞ք կնիք պատվիրելու դեպքում բոլոր գործարքներն ու փաստաթղթերը պետք է կնիքով հաստատել, թե՞ կարող եմ ըստ ցանկության կնիք դնել կամ չդնել, և միայն ստորագրությամբ հաստատել։

Տաթև․

Բարև ձեզ, հարգելի հաշվապահներ: Իրական շահառուների հայտարարագրի լրացման հետ կապված՝ 2023 թվին ներկայացվել է ԻՇ, որը ունեցել է մեկ շահառու, այս տարի ավելացել է ևս մեկ շահառու: Բայց նոր ավելացողի բաժնեմասը 81% է , իսկ նախկինինը 100-ից դարձել է 19%: Վերահանձնելու ժամանակ խմբագրում ենք, բայց նախկինի տվյալներն է պահպանվում: Ինչպե՞ս ավելացնել նոր բաժնետերին։

Տիգրան․

Բարև Ձեզ։ Ես շրջանառության հարկով աշխատող ԱՁ եմ, ուզում եմ անցնել ընդհանուր դաշտ։ Պահեստում ունեմ ապրանքային մնացորդ, որը ձեռք եմ բերել ՌԴ-ից և սահմանին վճարել եմ ԱԱՀ։ Ես կարո՞ղ եմ այդ ապրանքը մուտք անեմ որպես սկզբնական մնացորդ։ Դրա համար ինչ որ բան պե՞տք է վճարեմ։ Եվ այդ ապրանքի ԱԱՀ-ն ինձ կհաշվանցեն, թե՞ ոչ։ Եթե հնարավոր է՝ ուղղություն ցույց տվեք՝ ինչ անեմ, որ այդ մնացորդի ձևակերպումը ճիշտ լինի և կրկնակի չհարկվի։

Նարինե․

Ամուսինս ԱՁ է, զբաղվում է արևային վահանակների տեղադրման աշխատանքներով։ Նախորդ տարիներին աշխատել է միկրոձեռնարկատիրության դաշտում, սակայն նոյեմբերի 24-ից գերազանցեց 24 մլն շեմը, ու անցանք շրջանառության հարկի դաշտ։ Հիմա շահութահարկի հաշվարկը լրացնելու խնդիր ունեմ, լրացման ձևը չեմ հասկանում, որ խնդրեմ, կօգնե՞ք։

Թինա․

Բարև Ձեզ, հարգելի հաշվապահներ։ Ֆիզիկական անձը նկարչական ծառայություններ է մատուցում ՀՀ տարածքից դուրս գտնվող ոչ ռեզիդենտ IT ֆիրմային: Հարցերս հետևյալն են․

1․ Ֆիզ անձի մատուցված ծառայությունները կարո՞ղ են համարվել որպես ստեղծագործական ծառայություններ, և նա կկարողանա աշխատել միկրոձեռնարկատիրության դաշտում

2․ Ֆիզ անձը նախօրո՞ք պիտի ՀՎՀՀ վերցնի 2024թ․ համար և դուրս գրված հաշիվներում այդ ՀՎՀՀ-ն նշի։

Նախապես շնորհակալություն։

Անի․

Բարև Ձեզ, հարգելի մասնագետներ, հարցս հետևյալն է. բնապահպանության հարկային հաշվարկի մեջ հարկման բազան առանց ԱԱՀ-ի է, թե՞ ոչ։

Սվետա․

Բարև Ձեզ: Խնդիրս այսպինին է, խնդրում եմ օգնել․

Ֆիզ. անձը վարձակալությամբ է տվել իր տարածքը ԱՁ-ին, որը գործում է որպես գեղեցկության սրահ: Վարձակալությունը իրար միջև եղել է ներքին պայմանավորվախությամբ: Այս օրենքի փոփոխությունից հետո ֆիզ. անձը կդիմի ՊԵԿ գրանցման համար։

Հարց. այս դեպքում 10% հարկը վճարում է ԱՁ-ն և եթե այո, ապա ի՞նչ հաշվետվության ձևով և ինչպե՞ս: Նախապես շնորհակալ եմ:

Վահան․

Բարև ձեզ, հարգելի հաշվապահներ։ Ես ուզում եմ կայքի միջոցով օնլայն ծառայություն մատուցել։ Կայքը արհեստական բանականության միջոցով նկարներ է գեներացնում։ Ամեն նկարի համար օգտվողը պետք է վճարի։ Կարո՞ղ եմ գործել որպես միկրոձեռնարկատիրություն այս դեպքում։

Լիլիթ․

Հարգելի հաշվապահներ, հարցս հետևյալն է․ եթե ՀՀ ռեզիդենտ Ընկերությունը աշխատում է ընդհանուր հարկման դաշտում և ՌԴ ԱՁ-ից ծառայություններ է ստանում, արդյո՞ք պետք է դուրս գրել ինքնահաշիվ և արդյո՞ք ԱՁ ին տրված եկամուտը կհարկվի եկամտային հարկի 20% -ով։ Նշեմ նաև, որ ծառայությունը իրենից ներկայացնում է տեխնիկական փաստաթղթերի ճշգրտում։

Գոռ․

Բարև Ձեզ: Իսկ կա՞ վարձակալության մինիմալ կադաստրային արժեքի չափ։

Աշոտ․

Բարև Ձեզ: Խնդրում եմ տեղեկացնել՝ ի՞նչ հարկեր և տուրքեր են գումարվում Ռուսաստանից ներմուծվող պրոպան գազի գնին:

Հայկ․

Բարև Ձեզ։ Նորաբաց ԱՁ-ն գործունեություն չէր ծավալել, ԱԱՀ համակարգում էր ու հանձնում էր 0-ական հաշվետվություններ: Այս տարվանից ուզում եմ դիմում ներկայացնել շրջ. հարկի համակարգ անցնելու համար: Դիմումն հիմա ներկայացնելուց կարո՞ղ եմ նշել, որ 2024-ի Հունվարի 1-ից համարվեմ շրջանառության հարկ վճարող:

Սեդա․

Բարև Ձեզ։ Եթե ԱԱՀ վճարող կազմակերպությունը 2024թ սրահից ձեռքբերի մարդատար ավտոմեքենա, ԱԱՀ-ն ե՞րբ պետք է հաշվանցենք:

Գայանե․

Բարև Ձեզ, այսպիսի մի հարց․ խանութը սխալմամբ 3 950 փոխարեն ՀԴՄ կտրոնը տպել է 39 500։ Ինչպե՞ս է հնարավոր շտկել։

Հարգելի՛ վիճակագրական տեղեկություններ ներկայացնող (ռեսպոնդենտ)՝

Սույնով ՀՀ վիճակագրական կոմիտեն (Արմստատ) տեղեկացնում է Ձեզ առ այն, որ 2024թ.-ի փետրվարի 1-ից գործարկելու է Պաշտոնական վիճակագրական հաշվետվությունների հավաքման առցանց համակարգը (այսուհետ՝ ՀԱՄԱԿԱՐԳ) և դադարեցնելու է հաշվետվությունների՝ էլեկտրոնային փոստի միջոցով հավաքման  գործընթացը:

          Նշվածով պայմանավորված, Արմստատը, 2024թ.-ի փետրվարի  1-ից հետո 2024 թ.-ի հաշվետու և 2023թ.-ի տարեկան ժամանակաշրջաններին վերաբերող բոլոր պաշտոնական վիճակագրական հաշվետվությունները հավաքելու է ՀԱՄԱԿԱՐԳ -ի միջոցով՝ պահպանելով համապատասխան հաշվետվությունների ներկայացման ժամկետները:

Շնորհակալություն համագործակցության համար: