Toyota ընկերությունը` ամենախոշոր ավտոարտադրողը աշխարհում, առաջին անգամ 1950 թ-ից հետո տարին ավարտել է վնասով: Դրա համար պատճառ է հանդիսացել գլոբալ տնտեսական ճգնաժամը, որի պատճառով նվազել է մեքենաների պահանջարկը:
Ֆինանսական տարվա վերջում, որը սկսվել է 2008թ. ապրիլի 1-ից, վնասը կազմել է գրեթե 437 միլիարդ իեն (4,4 միլիարդ դոլար):Դրանից մեկ տարի առաջ Toyota-ն ստացել է ընկերության համար ռեկորդային շահույթ:
Ավտոարտադրողը ավելի մեծ վնասների սպասումներ ունի ընթացիկ ֆինանսական տարում:
Իր բազմաթիվ մրցակիցների նման Toyota-ն նույնպես կրճատել է արտադրության ծավալները:
Ավտոմոբիլային ընկերության ղեկավարությունը խոշոր վնասների պատճառներ է համարում նաև հումքի գները և Ճապոնիայի ազգային արժույթի բարձր փոխարժեքը, ինչը հանգեցնում է մեքենաների թանկացմանը արտասահմանում:
Ինչպես հայտարարել է ընկերության նախագահ Կաթսուակի Վատանաբեն, ավարտված ժամանակահատվածում նվազել են “և´ հասույթը, և´ եկամուտները”:Նա ավելացրել է, որ կորուստները ավտոմեքենաների վաճառքի էական կրճատման (մասնավորապես ԱՄՆ-ում և Եվրոպայում) արդյունքն են:
Toyota-ն կանխատեսում է, որ ընթացիկ տարում` 2009թ-ի ապրիլից մինչև 2010 թ. ապրիլը, վնասը ավելի մեծ կլինի` մոտ 550 միլիարդ իեն (5,5 միլիարդ դոլար)
“Կարծում եմ, որ բավական ժամանակ դեռ կանցնի, նախքան Եվրոպայի և ԱՄՆ-ի ֆինանսական շուկաները կվերականգնվեն ճգնաժամից հետո”,- ավելացրել է Վատանաբեն:
Ճապոնական մյուս առաջատարը` Toshiba-ն, նույնպես վնասներ է կրում: Ֆինանսական տարվա արդյունքներով ընկերության վնասը կազմել է 3,5 միլիարդ դոլար, իսկ վաճառքը կրճատվել է 13 %-ով:
Ընկերությունը պլանավորում է ներգրավել 5 միլիարդ դոլար` թողարկելով նոր բաժնետոմսեր:
Աղբյուր` BBC
Ամերիկյան ավտոմոբիլային ոլորտը նույնպես ճգնաժամ է ապրում: Եթե Toyota-ն ընդամենը վնասներ է կրում, ապա ԱՄՆ – ում արդեն սկսել են Chrysler ընկերության սնանկ ճանաչելու գործընթացը…
Ամերիկյան ավտոարդյունաբերությունը իսկապես գտնվում է ճգնաժամային վիճակում: Եվ խոսքը գնում է ոչ միայն Chrysler – ի մասին: General Motors – ը շուտով ստիպված է լինելու անցկացնել սնանկացման գործընթաց, քանի որ նրան չի հաջողվում համաձայնության գալ իր կրեդիտորների հետ:
Ռուսական ընկերությունն առաջին անգամ կդառնա համաշխարհային խոշոր ավտոարտադրության սեփականատեր: Կանադական Magna-ն Խնայբանկի ու ԳԱԶ-ի հետ պատրաստվում են գնել գերմանական Opel-ը, որը ամերիկյան General Motors-ը վաճառում է սնանկության պատճառով: Ակնկալվում է, որ հունիսի 1-ին այդ կոնցեռնը կհայտարարի սնանկության մասին: Բացի Magna-ից ընկերությունը ձեռք բերելու հավակնություն ունի նաև Fiat-ը:
Բանակցություններն ընթացքի մեջ են: Bloomberg լրատվական գործակալության տվյալներով` Magna-ն պատրաստ է Opel-ի համար վճարել 700 մլն եվրո: Ռուս փորձագետները տարակուսած են, թե որտեղի՞ց Խնայբանկին ազատ միջոցներ, և թե այն տեխնոլագիական առումով ինչպե՞ս է համագործակցելու Opel-ի և ԳԱԶ-ի հետ: Բանկի ներկայացուցիչները դեռևս չեն մեկնաբանում գործարքը:
Աղբյուր` panorama.am
Ամերիկյան խոշորագույն ավտոարտադրող General Motors-ը հայտարարել է իր` ԱՄՆ պատմության մեջ ամենախոշոր սնանկացման մասին: Այդ որոշումը օժանդակվել է կառավարության կողմից եւ սպասված էր. ընկերության արտադրանքի վաճառքը լրջորեն անկում ապրեց վերջին տարիների ընթացքում, նրա պարտքը` մոտ $170 միլիարդ, գրեթե երկու անգամ գերազանցել է նրա շուկայական արժեքը: Ենթադրվում է, որ այժմ բաժնետոմսերի 60% կգնի պետությունը, որը General Motors-ին բազմամիլիարդանոց օգնություն է ցուցաբերել:
Աղբյուր` panarmenian.net
Սնանկացած ամերիկյան General Motors ընկերությունը և շվեդական Koenigsegg Group AB – ն ստորագրել են փոխհասկացողության հուշագիրˋ վերջինիս կողմից Saab Automobile AB – ի գնման մասին: Համաձայն գործարքի պայմաններին` Saab – ը կստանա 600 միլիոն դոլարի չափով վարկ Եվրոպական ներդրումային բանկի (EIB) կողմից: Բացի դա, GM – ը և Koenigsegg Group AB – ն պարտավորվում են ներդրումներ կատարել Saab – ի արտադրության մեջ: Գործարքը պլանավորվել է ավարտել 2009 թ-ի III եռամսյակի վերջում:
«General Motors Corp»-ը (Ջեներալ Մոթորս), որը ամերիկյան ավտոարտադրող առաջատար ընկերություններից է, ուրբաթ օրը ստորագրել է համաձայնագիր` իր հիմնական ակտիվները նոր ընկերության վաճառելու մասին: Այդ ընկերության հսկիչ փաթեթը պատկանում է ԱՄՆ կառավարությանը: Այս մասին հաղորդում է «Ասոշիեյթիդ պրեսս» գործակալությունը: Այսպիսով, GM-ն ավարտեց սնանկացման գործընթացը, որի մասին հայտարարել էր հունիսի 1-ին:
Ակնկալվում է, որ առաջիկա ժամերին GM-ի ղեկավար Ֆրից Հենդերսոնը և տնօրենների խորհրդի նոր ղեկավար Էդվարդ Ուայտակերը Դեթրոյթում կհրավիրեն մամուլի ասուլիս ու կհրապարակեն համաձայնագրի մանրամասները:
Աղբյուր` panorama.am