Հասկանալի է հիասթափությունը սկսնակ հաշվապահների մոտ, երբ աշխատանք չեն կարողանում գտնել, և փորձի պակասի պատճառով մերժումներ ստանալը հոգեբանորեն ճնշող է։ Սակայն հաշվապահական ոլորտում մրցակցությունը մեծ է, և գործատուները հաճախ խուսափում են սկսնակներից սխալվելու բարձր ռիսկերի և տուգանքների պատճառով։
Ահա գործնական քայլեր, որոնք կօգնեն բացել փակ դռները և ձեռք բերել առաջին աշխատանքը։
1. Փոխեք աշխատանք փնտրելու մարտավարությունը
- Մի՛ դիմեք խոշոր ընկերություններ: Նրանք միշտ փնտրում են պատրաստի մասնագետներ։
- Թիրախավորեք հաշվապահական ընկերություններ: Այս ընկերություններն ունեն շատ պարզ, մեխանիկական գործեր, որոնք սիրով պատվիրակում են սկսնակներին։
- Փնտրեք փոքր կազմակերպություններ կամ ԱՁ-ներ: Նման բիզնեսները չունեն մեծ բյուջե և պատրաստ են աշխատել սկսնակների հետ։
2. Զարգացրեք գործնական հմտությունները ինքնուրույն
- Տիրապետեք ՀԾ (Armenian Software) և 1C ծրագրերին: Միայն տեսական գիտելիքը բավարար չէ, ծրագրերի գերազանց իմացությունը պարտադիր է։
- Ուսումնասիրեք Taxservice և e-Invoicing համակարգերը: Սովորեք հաշիվներ դուրս գրել և հաշվետվություններ հանձնել (թեկուզ դեմո տարբերակներով)։
- Հետևեք օրենսդրական փոփոխություններին: Գործատուները գնահատում են հարկային օրենսգրքի թարմացումներին տիրապետողներին։
3. Ակտիվացրեք մասնագիտական ցանցը (Networking)
- Միացեք հաշվապահական խմբերին և ակտիվորեն մասնակցեք քննարկումներին: Նման հարթակ է հանդիսանում “Հաշվապահների խումբը“։
- Այցելեք սեմինարների և թրեյնինգների: Սա լավագույն վայրն է փորձառու հաշվապահների հետ ծանոթանալու և թափուր աշխատատեղերի մասին իմանալու համար։
- Խոսեք Ձեր շրջապատի հետ: Տեղեկացրեք բոլոր ծանոթներին, որ փնտրում եք աշխատանք, շատ հաճախ առաջին գործը գտնվում է խորհուրդների միջոցով։
4. Բարելավեք Ձեր ինքնակենսագրականը (CV)
- Շեշտադրեք թվային հմտությունները: Օրինակ՝ նշեք MS Excel-ի լավ իմացության մասին (VLOOKUP, Pivot Tables)։
- Նկարագրեք Ձեր տեսական պրակտիկան: Եթե դասընթացների ժամանակ խնդիրներ եք լուծել կամ հաշվեկշիռ կազմել, ներկայացրեք դա որպես գործնական հմտություն։
- Ներկայացրեք Ձեր այն ուժեղ կողմերը, որոնք կնպաստեն աշխատանքի արդյունավետ իրականացմանը։
Եվ ամենակարևորը՝ երբեք մի հուսահատվեք։ Լավագույն առաջարկները շատ հաճախ ստացվում են անսպասելի։