Չօգտագործված արձակուրդի համար դրամական հատուցման վերաբերյալ

Արսեն.

Ողջույն բոլորին։

Ունեմ ձեր օգնության կարիքը։ Ենթադրենք՝ ես աշխատում եմ x կազմակերպությունում գրանցված։ Աշխատում եմ շաբաթական 5 աշխատանքային օր։ Ունեմ ամենամյա արձակուրդի իրավունք՝ նվազագույնը 20 օր։ Եթե ես չեմ օգտվում իմ ամենամյա արձակուրդից, կա այսպիսի օրենք, որում ասվում է, որ «Օրենսգրքի 100-րդ կամ 101-րդ հոդվածով սահմանված ժամկետներով կնքված, ինչպես նաև մինչև վեց ամիս աշխատած աշխատողների հետ աշխատանքային պայմանագիրը լուծվելու դեպքում գործատուն չօգտագործված ամենամյա արձակուրդի համար աշխատողին վճարում է դրամական հատուցում` սույն հոդվածի 2-րդ մասին համապատասխան»: Այսինքն՝ վճարվում է ինչ-որ չափի գումար վերջնահաշվարկի ժամանակ։ Բայց եթե աշխատանքի տարին լրանալուց գործատուն առանց իրազեկելու ձևակերպում է ամենամյա արձակուրդ, դա թույլատրվու՞մ է և արդյո՞ք դա նորմալ է։ Կա՞ օրենքում այնպիսի կետ, երբ ես անպայման պետք է օգտվեմ ամենամյա արձակուրդից։ Եվ ի՞նչ խորհուրդ կտաք ձեռնարկել այդ դեպքում։ Շնորհակալություն։

Կիսվել՝

Facebook մեկնաբանություններ

Հետևել այս նյութին
Ստանալ նամակ
guest
12 Մեկնաբանություն
Հները
Նորերը Most Voted
Inline Feedbacks
Դիտել բոլոր մեկնաբանությունները
Մարիամ

Բարև Ձեզ: Այո, Ձեր կողմից նշվածը Աշխատանքային օրենսգրքի 170-րդ հոդվածի 1.1 մասն է: Այն վերաբերում է սեզոնային, ժամանակավոր և մինչև վեց ամիս աշխատած աշխատողին: Եթե Դուք նման աշխատող եք և ազատվում եք աշխատանքից, ապա Ձեզ վճարվում է դրամական հատուցում չօգտագործված արձակուրդի համար: Իսկ եթե Ձեր պայմանագիրը շարունակվում է, և Դուք նշում եք տարին լրանալու մասին, ապա վերջնահաշվարկ չի տրվում: Նույն հոդվածի 1 մասում նշվում է, որ ամենամյա արձակուրդի փոխարինումը դրամական հատուցմամբ չի թույլատրվում: Իսկ եթե աշխատողը չի ցանկանում գնալ արձակուրդ, ապա դրամական հատուցումը վճարվում է աշխատանքային պայմանագիրը լուծվելու դեպքում:

Արսեն

Ողջույն, հարգելի Մարիամ։ Եթե աշխատողը չի ցանկանում օգտվել արձակուրդից, ապա գործատուն առանց աշխատողին իրազեկելու արձակուրդ ձևակերպելու իրավունք չունի և չօգտագործած արձակուրդի դրամական հատուցումը վճարվում է աշխատանքային պայմանագիրը լուծվելու դեպքում։ Ճի՞շտ է։

Արսեն

Շնորհակալություն, հարգելի Մարիամ։ Եվս 1 կարճ հարց։ Արդյո՞ք գործատուն իրավունք ունի տարին լրանալուն պես արձակուրդը չօգտագործած աշխատողի համար ձևակերպել ամենամյա արձակուրդ` առանց աշխատողի ցանկության և նույնիսկ առանց աշխատողին իրազեկելու։

Արսեն

Կներեք, նույն հարցը 2 անգամ է կրկնվել 🙂

Մարիամ

Հարգելի Արսեն, գործատուն համաձայնեցնում է Ձեզ հետ արձակուրդի գնալու ժամանակահատվածը, որից հետո ձևակերպում արձակուրդ: Եթե Դուք չեք ցանկանում օգտվել արձակուրդից՝ դրամական հատուցում ստանալու նպատակով, ապա ինչպես նշել եմ՝ ամենամյա արձակուրդի փոխարինումը դրամական հատուցմամբ չի թույլատրվում: Իսկ եթե այդ ժամանակահատվածում չեք ցանկանում գնալ արձակուրդ, բայց ցանկանում եք այն տեղափոխել այլ ժամանակ, ապա պետք է օգտվեք արձակուրդից նույն աշխատանքային տարում (աշխատանքային տարին օրացուցային օրերով հաշվարկվող ժամանակահատված է, որն սկսվում է աշխատողի հետ աշխատանքային պայմանագրով և ավարտվում է հաջորդ օրացուցային տարվա համապատասխան ամսին և ամսաթվին), բայց ոչ ուշ, քան 18 ամսվա ընթացքում` սկսած այն աշխատանքային տարվա վերջից, որի համար աշխատողին չի հատկացվել կամ մասնակի է հատկացվել ամենամյա արձակուրդը: Կարող եք ծանոթանալ նաև Աշխատանքային օրենսգրքի հոդված 167. Ամենամյա արձակուրդի տեղափոխումը և երկարաձգումը:

Արսեն

Լավ, հարցս այլ կերպ տամ: Ես ունեմ արձակուրդի հնարավորություն, բայց չեմ ցանկանում դրանից օգտվել: Գործատուն իրավունք ունի՞ ձևակերպել արձակուրդ` առանց իմ ցանկության: Եվ արդյո՞ք կա ինչ-որ ժամանակահատված, երբ ես անկախ իմ ցանկության պետք է օգտվեմ արձակուրդից: Շնորհակալություն։

Մարիամ

Այո, կա, և ես արդեն նշել եմ. Դուք, պետք է օգտվեք արձակուրդից 18 ամսվա ընթացքում: Իսկ գործատուն կարող է ձևակերպել արձակուրդ, որովհետև նա ոչ կարող է Ձեզ դրամական հատուցում վճարել արձակուրդի փոխարեն, ոչ էլ իրավունք ունի Ձեզ չտրամադրել արձակուրդ:

Արսեն

Կներեք, իսկ դա աշխատանքային օրենսգրքի ո՞ր հոդվածով է նախատեսված:

Մարիամ

Ձեր աշխատանքային պայմանագրում պետք է որ լինի կետ, որտեղ նշված է. «Սույն կետով կողմերը համաձայնվում են, որ աշխատողին ամենամյա արձակուրդը տրամադրվում է Գործատուի կողմից հաստատված ամենամյա արձակուրդների տրամադրման հերթականությամբ»: Սա նշանակում է, որ գործատուն կարող էր ձևակերպել Ձեր արձակուրդը՝ ըստ իր կողմից հաստատված արձակուրդների հերթականության: 18 ամսվա ընթացքում արձակուրդից օգտվելու վերաբերյալ՝ հոդված 167, դրամական հատուցման վերաբերյալ՝ հոդված 170:

Արսեն

Դա արձակուրդի տեղափոխման և երկարաձգման հոդվածն է, բայց այնտեղ նաև ասվում է, որ աշխատողի միջնորդությամբ կամ համաձայնությամբ ամենամյա արձակուրդի չօգտագործված մասը կարող է տեղափոխվել և միացվել հաջորդ տարվա ամենամյա արձակուրդին:

Բերեմ մի պարզ օրինակ: Ես աշխատում եմ ինչ-որ կազմակերպությունում 15 ամիս և արձակուրդից դեռ չեմ օգտվել: Հիմա եթե ես վերցնեմ արձակուրդ, այդ արձակուրդը համարվելու է 2-րդ տարվա (12 ամսից հետո) հասանելիք արձակուրդը: Իսկ 1-ին տարվա արձակուրդը (մինչև 12 ամիս) վերջնահաշվարկի ժամանակ հաշվարկվելու է, քանի որ, ինչպես դուք նշել եք, եթե աշխատողը չի ցանկանում գնալ արձակուրդ, ապա դրամական հատուցումը վճարվում է աշխատանքային պայմանագիրը լուծվելու դեպքում:

Մարիամ

Եթե Դուք ազատվեք աշխատանքից 18 ամսվա ընթացքում՝ սկսած այն աշխատանքային տարվա վերջից, որի համար Ձեզ չի հատկացվել արձակուրդ, վերջնահաշվարկի ժամանակ կհաշվարկվի չօգտագործած արձակուրդի գումարը, բայց եթե չազատվեք աշխատանքից, ապա պետք է այդ ժամանակահատվածում մարեք տվյալ աշխատանքային տարվա արձակուրդը: Շատ լավ կլիներ, եթե աշխատողը տարիներով արձակուրդ չգնար և տարիներ անց աշխատանքից ազատվելիս նրան վճարեին մեծ գումարով վերջնահաշվարկ, այդպես չէ՞: Բացի այդ արձակուրդը աշխատողին տրամադրվում է հանգստանալու և աշխատունակությունը վերականգնելու համար: Եթե աշխատողը երկար ժամանակ արձակուրդ չգնա, գուցե և գործատուի համար դառնա անաշխատունակ:

Արսեն

Վերջ, ամեն ինչ հասկանալի է: Շատ շնորհակալ եմ, Մարիամ ջան: