Կարո՞ղ է գործատուն հղիին ուղարկել չվճարվող արձակուրդ

Բարև Ձեզ, հարգելի Հասմիկ: Եթե խոսքը հղիության և ծննդաբերության արձակուրդի մասին է, ապա այն չի վճարվում, եթե Ձեզ հետ կնքվել է Քաղաքացիաիրավական պայմանագիր: Իսկ եթե Դուք գործատուի հետ ունեք աշխատանքային պայմանագիր, ապա Ձեզ պետք է տրամադրվի հղիության և ծննդաբերության վճարվող արձակուրդ: Աշխատանքային օրենսգրքի հոդված 172. Հղիության և ծննդաբերության արձակուրդը:

1. Աշխատող կանանց տրամադրվում է հղիության և ծննդաբերության արձակուրդ`
1) 140 օր (70 օր` հղիության, 70 օր` ծննդաբերության)
2) 155 օր (70 օր` հղիության, 85 օր` ծննդաբերության)` բարդ ծննդաբերության դեպքում
3) 180 օր (70 օր` հղիության, 110 օր` ծննդաբերության)` միաժամանակ մեկից ավելի երեխաներ ունենալու դեպքում:

Հարգելի Հասմիկ, Աշխատանքային օրենսգրքում նշվում է չվճարվող արձակուրդ տրամադրելու հիմքը՝ աշխատողի պահանջով կամ կողմերի համաձայնությամբ, բայց ոչ գործատուի պարտադրանքով: Իսկ գործատուն ի՞նչ հիմքով է նման հրաման ձևակերպել, եթե չի եղել աշխատողի պահանջը: Միգուցե հղին վատառողջ է եղել, և գործատուն գտել է, որ նրան հանգիստ է պետք՝ առողջությունը չվտանգելու համար: Չնայած այդ դեպքում նույնպես պետք էր երկու կողմերի համաձայնությունը:

Հարգելի Հասմիկ, եթե տրվել է չվճարվող արձակուրդի հրաման, որում հիմքը նշվել է Ձեր պահանջը կամ դիմումը, առանց Ձեր համաձայնության, ապա տեղի է ունեցել խախտում: Կարծում եմ՝ Ձեզ ներքին կարգով են ուղարկել հանգստի՝ առանց հրամանի: Ամեն դեպքում, ինչպես նշել եմ, չվճարվող արձակուրդ տրամադրվում է աշխատողի պահանջով կամ կողմերի համաձայնությամբ: Քանի որ պարզ չէ՝ ինչ փաստարկներ կարող է ներկայացնել գործատուն և ինչպես կհիմնավորի իր գործողությունները, դժվար է իմանալ արդյունքները բողոքարկելու դեպքում: