Ի՞նչ դասակարգիչ կիրառել առցանց գործունեության համար

առցանց գործունեությունը եթե մանրածախ վաճառք է, ապա դա դիտվում է որպես էլեկտրոնային առևտուր, ուստի Էկոնոմիկայի նախարարի 2013 թվականի սեպտեմբերի 19-ի թիվ 874-Ն հրամանով հաստատված Տնտեսական գործունեության տեսակների դասակարգչի համաձայն՝ նշված գործունեությունը դասվում է «G (ՋԻ) Մեծածախ և մանրածախ առևտուր. ավտոմեքենաների և մոտոցիկլների նորոգում» բաժնի «47․91․2 Ինտերնետով կամ փոստով ապրանքների մանրածախ առևտուր» ենթադասին։
Միաժամանակ՝ ՀՀ-ում էլեկտրոնային առևտրային հարթակի գործունեությունը կարգավորվում է մի շարք իրավական ակտերով, մասնավորապես՝ «Առևտրի և ծառայությունների մասին» օրենքը սահմանում է «էլեկտրոնային առևտրային հարթակ» հասկացությունը, որը ըստ օրենքի ծրագրային ապահովում է, այդ թվում՝ կայքէջ կամ դրա մաս, էլեկտրոնային հավելված, որը շահագործվում է վաճառողի կողմից կամ վաճառողի անունից և հնարավորություն է տալիս սպառողներին էլեկտրոնային եղանակով կնքելու պայմանագրեր տնտեսավարող սուբյեկտների կամ այլ անձանց հետ: Նույն օրենքի 4.1-ին գլխով կարգավորվում են Էլեկտրոնային եղանակով կնքվող պայմանագրի միջոցով առևտուր և (կամ) ծառայություն իրականացնելիս ներկայացվող պահանջները, համաձայն որի Էլեկտրոնային եղանակով կնքվող պայմանագրի միջոցով առևտուր և (կամ) ծառայություն իրականացնելիս գնորդին պետք է հասանելի լինի ի թիվս այլ տեղեկատվությունների՝ նաև պայմանագիր կնքելու համար անհրաժեշտ գործողությունների հաջորդականությունը, այդ թվում` օֆերտա կամ ակցեպտ համարվող գործողության վերաբերյալ ճշգրիտ տեղեկություն, որը պետք է պարունակի բավարար ու որոշակի տեղեկություններ պայմանագիրը կնքված համարվելու պահի մասին, ինչպես նաև տեղեկատվություն այն գործողության մասին, որն առաջացնելու է վճարման պարտականություն։
Քաղաքացիական օրենսգրքի 416.1-րդ և 416․2-րդ հոդվածները սահմանում են համապատասխանաբար Էլեկտրոնային հաղորդակցության ծառայություն մատուցողի և  Էլեկտրոնային առևտրային հարթակ շահագործողի սահմանափակ պատասխանատվության հիմքերը։