Tag: վարձակալություն

Արմինե․

Հարգելի մասնագետներ,

ԱԱՀ վճարող կազմակերպությունը ֆիզիկական անձից վարձակալել է տարածք՝ համապատասխան պայմանագրի հիման վրա։ Հարկային հաշվառման տեսանկյունից վարձավճարը որպես ծախս ճանաչելու համար արդյո՞ք բավարար է սովորական պայմանագրի առկայությունը, թե՞ անհրաժեշտ է նաև այն հաստատել նոտարով։ Նախապես շնորհակալություն։

Ստելլա․

Բարև Ձեզ, կասե՞ք խնդրեմ՝ շորերի վարձույթով զբաղվող ԱՁ-ն շրջհարկի ո՞ր տոկոսադրույքով է հարկվում՝ Այլ ծառայությունների մատուցու՞մ։

Արման․

Հարգելի հաշվապահներ, կազմակերպությունը ցանկանում է ձեռքբերել էլեկտրամոբիլ լիզինգով։ Ինչպե՞ս են կատարվելու այս ձեռքբերման մասով ծախսագրումները՝ բանկի կողմից դուրս գրված հաշիվների հիման վրա, թե՞ այլ եղանակով։ Նախապես շնորհակալություն։

Գոհար․

Բարև ձեզ, ես ներկայացնում եմ ԱԱՀ-ով աշխատող կազմակերպություն, որը ֆինանսական վարձակալությամբ / լիզինգով ձեռք է բերել տրանսպորտային միջոց։ Խնդրում եմ ներկայացնել լիզինգի ձևակերպումները։ Շնորհակալություն։

Լիկա․

Ողջույն։ Հարցս հետևյալն է․ ԱԱՀ հարկման դաշտում գործող ՍՊԸ-ն վարձակալում է տարածքը ֆիզ անձից, միևնույն ժամանակ ցանկանում ենք էլեկտրաէներգիայի մասով ծախսը ցույց տալ, սակայն տարածքի էլեկտրաէներգիան արտադրվում է լիզինգով ստացված արևային կայանով, որը մի ուրիշ ԱՁ-ի անունով է, մի փոքր խճճված է ստացվում, բայց կխնդրեի պարզաբանել իրավիճակը, որպեսզի հետագայում ՍՊԸ-ի համար խնդիրներ չառաջանան, օգտագործված հոսանքի հարցը կարողանանք լուծել, ի՞նչ տարբերակ կա նման տվյալ պարագայում։ Շնորհակալ եմ շատտտտ։

Մհեր․

Բարև ձեզ։ Անշարժ գույքի վարձակալության պայմանագրի վերջնաժամկետ օրը լրանալուց հետո չենք շարունակում վարձաակալության տալ, և ընդհանրապես գույքը վարձակալությամբ էլ չի շահագործվելու։ Նախորդ տարիների ընթացքում ՝ պայմանագրի գործողության ժամանակ հարկային վճարումները կատարվել են։ Հարց՝ գործունեությունը դադարեցնելու համար տարածքի սեփականատերը (ֆիզ. անձ ՀՎՀՀ-ով) ինչ-որ գործողություն ունի՞ անելու հարկայինում գործունեությունը կասեցնելու համար, եթե այո, ապա ի՞նչ է պետք անել։

Անահիտ Վասիլյան․

Բարև Ձեզ։ Շրջանառության հարկով պետք է աշխատեմ և վաճառելու եմ հագուստ, այսինքն մանրածախ առևտրով պետք է զբաղվեմ։ Ինչպես նաև փոքրիկ տարածք եմ վարձակալել։ Ի՞նչ հաշվետվություններ պետք է ուղարկեմ ՊԵԿ, և արդյո՞ք վիճհաշվետվություն ուղարկելու եմ վիճվարչություն։

Նարե․

Շրջ․ հարկով աշխատող ԱՁ-ն մեքենա է վարձակալել վրացական ընկերությունից և ենթավարձակալության հանձնել ՀՀ-ում։ Այդ դեպքում Վրաստանի հետ կրկնակի հարկումը բացառող համաձայնագիրը շահութահարկի մասով գործու՞մ է, և ԱԱՀ պարտավորություն առաջանու՞մ է։

Գոհար․

Հարգելի խորհրդատու, մեր շենքի տանիքի մի հատվածը տրամադրել ենք կազմակերպությանը, իր կայանները տեղադրելու համար։

Հարց․ 1․ Արդյո՞ք Օգտագործողի կողմից վճարվող գումարից պետք է վճարենք շահութահարկ

2․ Եթե այո, ապա, կարո՞ղ ենք այդ գումարից ներկայացնել ծախսեր շենքի ընդհանուր սպասարկման և նորոգման աշխատանքների համար (եթե այդ աշխատանքները չեն վերաբերում Օգտագործման իրավունքով տրամադրած տարածքին)։

Շնորհակալություն։

Մարիամ․

Հարգելի հաշվապահներ, եթե ԱՁ-ն իր մեքենան ուզում է տա վարձակալության, պայմանագիր կազմակելիս ԱՁ-ո՞վ պետք է կազմի, թե՞ ֆիզ․ անձով, ու հարկերի հաշվառումը ինչպե՞ս պետք է լինի։

Հայկ․

Բարև Ձեզ ունեմ երկու հարց:

Հարց 1. 2024թ.-ին ՀՀ քաղաքացի ֆիզիկական անձը իր անշարժ գույքը տվել է վարձակալության, գործարքը ստացել է պետական գրանցում: Եկամտային հարկը պահել և վճարել է հարկային գործակալը: Այս տարի այդ ֆիզ անձը պե՞տք է ներկայացնի հայտարարագիր, թե՞ ոչ:

Հարց 2. Հարց 1-ում նշված ֆիզ անձը զավակի համար վճարել է ուսման վարձ 2025թ. օգոստոսին: Արդյո՞ք նա կարող է 2026թ. օգտվել սոցիալական ծախսի փոխհատուցումից: Եթե ոչ, ապա կարո՞ղ է երեխայի մյուս ծնողը օգտվել, որը հանդիսանում է գրանցված աշխատող և հայտարարագիր ներկայացնող:

Նարինե․

Բարև Ձեզ։ ԱԱՀ-ով աշխատող ՍՊԸ-ն անհատույց վարձակալությամբ տարածք է ձեռք բերել ֆիզ անձից։ Այդ տարածքի համար ձեռք է բերվել վերելակ։ Արդյո՞ք կարող եմ վերելակը հաշվառել որպես ՍՊԸ-ի հիմնական միջոց, և ամորտիզացիոն նվազագույն ժամկետը քանի՞ տարի է վերելակի դեպքում։

Վիկա․

Հարգելի գործընկերներ, ՍՊԸ-ն վարձակալել է տարածք ֆիզ․ անձից։ Պայմանագիրը որևէ վավերացում չունի, սակայն ՍՊԸ-ն փոխանցումով է վճարում վարձը։ Վարձավճարը գրված է 70 000։ Գործարքը կնքվել է 2024 մայիսից։ ՍՊԸ-ն պե՞տք էր եկամտայինը վճարեր և ներառեր հաշվետվության մեջ։ Իսկ հարկայինը եթե չունի տվյալներ, ի՞նչ կհետևեր դրան։ Ինչպե՞ս կարելի է ուղղել իրավիճակը։ Ուղարկե՞լ անցած ամիսների համար ճշտված հաշվետվություններ և հանձնե՞լ 165 ձևը։

Հայկ․

Բարև Ձեզ։ ԱՁ-ն աշխատում է շրջանառության հարկով, ունի տարածքներ, տալիս է վարձակալության, որը կազմում է ամսական 300 000 ՀՀ դրամ։ Շրջ. հարկը վճարելու է եռամսյակի համար 90 000 ՀՀ դրամ և արդյո՞ք չի կարող կոմունալները կամ տնօրենի աշխատավարձը ծախս ճանաչել, թե՞ վարձակալության դեպքում նվազեցվող ծախսեր չկան։

Արմինե․

Բարև Ձեզ, հարգելի հաշվապահներ։ Խնդրում եմ ուղղորդել հետևյալ հարցում. Կազմակերպությունը (ԱԱՀ-ի դաշտում աշխատող) 2025թ.-ի փետրվար ամսին լիզինգով ձեռք է բերել ավտոմեքենա, որի համար վճարել է կանխավճար: Կանխավճարի համար լիզինգատու բանկի կողմից դուրս է գրվել հարկային հաշիվ, որում ԱԱՀ-ի գումարը կազմել է 3 200 200 դրամ: Այն ստորագրվել է մեր կողմից և արտացոլվել Փետրվար ամսվա ԱԱՀ-ի հաշվարկում: Արդյունքում մարտ ամսվա համար առաջացել է 1 500 000 դրամ դեբետային մնացորդ: Խնդրում եմ պատասխանել՝ մարտ ամսվա հաշվարկի 20-րդ տողում ինչպե՞ս լրացնեմ, որ ճիշտ լինի: Իմ իմանալով 20 տող Ավելացում /Ա/ 1 500 000, 20/1/ տող 1 500 000 հոդված 72 հոդված, 1-ին մաս, 9-րդ կետ: Արդյո՞ք ճիշտ եմ: Կանխավ շնորհակալություն։

Համլետ․

Բարև Ձեզ, ընկերությունը զբաղվում է իր սեփական տարածքները վարձակալության տալով։ Արդյո՞ք ընկերության կողմից վարձակալներին տրամադրված հոսանքի, գազի և ջրի համար ներկայացված հաշիվները կդիտվեն որպես չլիցենզավորված գործունեություն։

Անի․

Բարև ձեզ։ ԱՁ-ն, որը աշխատում է ԱԱՀ-ով (պատահական է հայտնվել հարկման ընդհանուր համակարգում, քանի որ շրջ․ հարկի հայտարարության ժամկետը բաց է թողնվել) մտադրություն ունի կասեցնելու գործունեությունը՝ ՍՊԸ գրանցելու և նույն գործունեությունը շարունակելու նպատակով: ԱՁ-ն ունի որոշ սարքավորումներ, որոնք պետք է տեղափոխվեն ՍՊԸ, բացի այդ կա տարածք, որը ԱՁ-ի սեփականությունն է: Արդյո՞ք հնարավոր է անհատույց օգտագործման պայմանագրով տարածքը տրամադրել ՍՊԸ-ին, և արդյո՞ք որևէ հարկ կառաջանա։ Սարքավորումների տեղափոխման հետ կապված կհուշեք տարբերակներ՝ առավել նպաստավոր հարկային տեսանկյունից: Կանխավ շնորհակալ եմ:

Հայկ․

Բարև Ձեզ։ Հարկային օրենսգրքի համաձայն շրջանառության դաշտում աշխատող առևտրով զբաղվող հարկ վճարողները կարղ են նվազեցնել նաև իրացման ծախսերը։ Հարկային օրենսգրքով սահմանված է, որ՝ իրացման ծախսեր են համարվում, մասնավորապես, ապրանքների մատակարարման, աշխատանքների կատարման և (կամ) ծառայությունների մատուցման հետ կապված` ապրանքների փաթեթավորման, պահպանման, բեռնման, տեղափոխման, բեռնաթափման, ուղեկցման, գովազդի և մարկետինգի ծախսերը։

Հարց․ Առևտրով զբաղվող հարկ վճարողը կարո՞ղ է ծախս ճանաչել վաճառողուհու աշխատավարձը կամ խանութի տարածքի վարձակալական վճարը։

Ալլա․

Բարև ձեզ: Մեր ՍՊԸ-ն տարածք է վարձակալում: Պայմանագիրը կա: Ինչպե՞ս անել, որ կոմունալների համար հաշիվ ստանանք, և արդյո՞ք միայն տնօրենը կարող է դա անել:

Լիլիթ․

ԱՁ պատրաստվում է վարձակալել ավտոտնակ՝ որպես պահեստ օգտագործելու նպատակով, ինչպես նաև պահեստից վաճառք կազմակերպելու համար անհրաժեշտ է գրանցել ՀԴՄ։ Հարց 1․ հնարավո՞ր է վարձակալության պայմանագիրը կնքել առանց նոտարի ու կադաստրի վավերացման (ԱՁ և ֆիզ անձ իրար հետ)։ Հարց 2․ հնարավո՞ր է պահեստի հասցեով գրանցել ՀԴՄ։ Շնորհակալություն։

Վահագն․

Բարև ձեզ, հարգելի՛ հաշվապահներ։ Այսպիսի մի հարց ունեմ։ Կարո՞ղ եմ ես ՍՊԸ-ով ոչ նոտարական վարձակալության պայմանագրի գումարը վճարել իմ (հիմնադիրն եմ) անձնական հաշվից և ձևակերպումներ չտալ, քանի որ առհաշիվ չեմ ուզում անել։ Էդ գումարի վերադարձը չեմ ուզում իրականացնել։ Նախապես՝ շնորհակալ եմ։

Անուշ․

Բարև ձեզ, սիրելի հաշվապահներ։

1. Եթե աշխատակիցը գրանցված աշխատող է և ունի նաև վարձակալությամբ տրված բնակարան, կարո՞ղ է հայտարարագիր լրացնի միայն վարձակալության համար

2. Այլ տրանսպորտային սարքավորանքի նորոգում և տեխնիկական սպասարկում, չներառված ուրիշ խմբավորումներում, որը գտնվում է մարզում, կարո՞ղ է աշխատել միկրոյով

Մարիամ․

Բարև ձեզ, կխնդրեյի մի քանի հարցի պատասխաններ պարզաբանել․

1 ԱՁ–ն աշխատում է շրջ․ հարկով, վաճառում է միս։ Միսը ձեռք է բերվում ֆիզ․ անձանցից, որոնք տվյալ չեն տրամադրում երկկողմանի գնման ակտեր կազմելու համար, այս դեպքում վաճառողը հարկվելու՞ է 20%, գյուղ․ մթերքը ազատվա՞ծ չէ այս մասով։

2. Տարածքի վարձակալությունը նվազեցվու՞մ է, եթե կա պայմանագիր և հարկային հաշիվ, և ՀԴՄ սպասարման, POS տերմինալների սպասարկման վճարը։

Շնորհակալություն։

Հասմիկ․

Ողջույն, հարգելի կոլեգաներ։ Թարգմանչությամբ զբաղվող ԱՁ-ն նաև տերմինալ է տեղադրել այն տարածքում, որտեղ իրականացնում է թարգմանչական գործունեությունը, տերմինալը անհատույց է իրեն տրվել, տարածքը իր անունով չի։ Խնդրում եմ ուղղորդել՝ ի՞նչ հարկատեսակով է հարկվելու, տերմինալի դասակարգիչը և արդյո՞ք տարածքի և տերմինալի անհատույց վարձակալության պայմանագիր անհրաժեշտ է, որտեղ տեղադրված է տերմինալը։ Կանխավ շնորհակալ եմ։

Կարինե․

Բարի օր, խնդրում եմ, կասե՞ք՝ ի՞նչ հաշվետվություն պիտի ներկայացնի ֆիզիկական անձը, ով 2024թ-ից սկսած վարձակալության է տվել բնակարանը, ստացել է ՀՎՀՀ, վճարում է եկամտային հարկը միասնական հաշվին, և նրան տեղեկացրել են, որ պիտի հաշվետվություն ներկայացնի 2024թ-ի համար։ Արդյոք խոսքը https://self-portal.taxservice.am/sign-in/ -ի հայտարարագրին է վերաբերում, թե՞ այլի մասին է խոսքը։

Անահիտ․

Նոր բացվող սուպերմարկետ է, աշխատելու է ԱԱՀ-ով։ Մսի վաճառքի համար տարածք է տրամադրվելու շրջհարկով աշխատող ԱՁ-ի, որի վաճառած ապրանքը պետք է անցնի մեր ՀԴՄ-ով։ Կասե՞ք՝ ինչպե՞ս է նման դեպքերում արվում, որպեսզի տվյալ ԱՁ-ի հասույթը չխառնվի սուպերմարկետի հասույթի հետ։

Արմեն․

Բարև ձեզ, ես հանդիսանում եմ ՌԴ հարկային ռեզիդենտ։ Բնակվում և աշխատում եմ ՌԴ-ում, սակայն ՀՀ-ում ունեմ վարձակալությամբ տրված անշարժ գույք, իսկ բանկում՝ ավանդ։ Հաջորդ տարի պետք է ներկայացնեմ հայտարարագիր ՀՀ-ում եկամուտների մասին։ Հարցս հետևյալն է՝ հայտարարագրում պետք է նշել միայն ՀՀ-ում անշարժ գույքի վարձակալությունից ստացված եկամուտը, թե՞ ՀՀ բանկում ունեցած ավանդից ստացած եկամուտը նույնպես։ Բանկից ասեցին, որ հարկը ավտոմատ կերպքով վճարվում է, բայց թե ինչ լրացնել հայտարարագրում՝ հասկանալի չի։

Մյուսը՝ ՌԴ-ում ստացած աշխատանքային եկամուտը պե՞տք է նշել թե ոչ։ Ես ՌԴ հարկային ռեզիդենտ եմ և հարկերը վճարում եմ ՌԴ-ում։ Ի՞նչ անել ՌԴ-ում բանկային խնայողական հաշվին եկած տոկոսների հետ։ Դա է՞լ է նշվում, թե՞ ոչ։ ՌԴ բանկերը ավտոմատ կերպով հարկը վճարում են այդ տոկոսից ՌԴ բյուջե։

Արև Հայրապետյան․

Ողջույն, հարգելի հաշվապահներ, խնդրում եմ պարզաբանել. շրջ. հարկով աշխատող ԱՁ-ն ֆիզ. անձին հոկտեմբերին վարձակալությամբ տարածք է տրամադրել: Եռամսյակային շրջանառության հարկի հաշվետվության մեջ պե՞տք է արտացոլվի վարձակալության գումարը, թե՞ 2024թ.-ի հայտարարագրով ներկայացվի:

Հովհաննես․

Հարգելի հաշվապահներ, խնդրում եմ պարզաբանեք․

1․ Արտադրական գործունեությունից ստացվող եկամուտներից արդյո՞ք նվազեցվում է տարածքի (արտադրամասի) վարձակալության վճարը (վարձակալությունը ստանում ենք կազմակերպությունից, և առկա է հաշիվ վավերագիր)

2․ Պետական աջակցության ենթակա գործունեության տեսակներով զբաղվող տնտեսվարող սուբյեկտները 01․01․2025-ից շարունակու՞մ են վճարել 5% շրջանառության հարկ, անկախ այն փաստից հարկային արտոնություններից օգտվելու հավաստագիր ստացել են, թե ոչ

3․ Այլ գործունեությունից ստացվող եկամուտներից նվազեցվում են անմիջականորեն կապված ծախսեր, եթե այդ ծախսերը կատարվում են ՀՀ-ից դուրս, և առկա չէ հաշիվ վավերագիր

Կանխավ շնորհակալություն։