Tag: շրջանառության հարկ

Տիգրան․

Բարև Ձեզ, ընկերությունը 2025 թվականի փետրվար ամսից զբաղվելու է ՏՏ գործունեությամբ։ Հարկային օրենսգրքում շրջանառության հարկի դրույքաչափը նշված է 1 տոկոս։ Ինձ հետաքրքրում է՝ արդյո՞ք բացի մինչև փետրվարի 20-ը ներառյալ շրջհարկի հայտարարություն տալուց պետք է նաև այլ պահանջների բավարարել, ասենք հավաստագիր, արտոնագիր, թե՞ գործունեության տեսակով պայմանավորված ավտոմատ նշված դրույքաչափով ենք շրջհարկ մուծելու։ Շնորհակալություն։

Ռոման․

Բարև ձեզ։ Եթե շրջանառության հարկով աշխատող կազմակերպությունը ապրանքները ձեռք է բերել առանց փաստաթղթի և տարեվերջին ունի ապրանքային մնացորդ, այդ դեպքում կարո՞ղ է արդյոք մնացորդի նկատմամբ կիրառվել եկամտային հարկ։

Շնորհակալություն։

Աննա․

Բարև Ձեզ, հարգելի հաշվապահներ։ ԱՁ-ն բիզնես քարտով դոմեյն էր գնել 2023-ի Նոյեմբեր ամսին ԱՄՆ կայքից: Ծառայությունն վավեր է երկու տարով: Անցած տարի ընդհանուր հարկման դաշտում էր մնացել ու գրեթե գործունեություն չի ծավալել, հիմա շրջանառության հարկի համակարգում է: Ճի՞շտ եմ հասկանում, որ ըստ ՀՕ Հ40-ի երկու տարին լրանալու օրն է ծառայության մատուցման պահն: Այսինքն, որպես շրջանառության հարկ վճարող ինքնահաշիվ դուրս գրել պետք չի, պետք է միայն ոչ ռեզիդենտի շահութահա՞րկ վճարել 20%:

Իսկ այն որ 2023-ի շահութահարկի տարեկան հաշվետվության մեջ ծառայության գումարն "Վարչական ծախսերը / Տեղեկատվական ծառայությունների գծով ծախսերը" տողում եմ լրացրել, խնդիր չի՞ այս պարագայում:

Պարզապես նոր եմ իմանում ոչ ռեզիդենտի շահութահարկի մասին: Շատ եմ վախենում որ 10$-անոց ծառայության համար կարող է լուրջ տուգանք առաջանալ:

Հայկ․

Բարև Ձեզ։ Շրջանառության հարկով աշխատող ԱՁ-ն 2025 թվականին պետք է իրականացնի բեռնափոխադրումներ ՀՀ-ից դեպի այլ երկրներ։ Այլ երկրներում բենզին է լցնում։ Կասե՞ք՝ բենզինի համար շրջանառության հարկով ծախս ճանաչելու համար ի՞նչ հիմք է պետք։

Գայանե․

Բարև ձեզ: Ասացեք խնդրեմ՝ ՏՏ ոլորտի շրջանառության հարկը հաջորդ տարի քանի՞ տոկոս է լինում: Շնորհակալ եմ։

Մելինե․

Օնլայն առևտրով զբաղվող ԱՁ-ն, որը շրջանառության հարկով է հարկվում, 2024 թվականին 7 մլն դրամի էլեկտրոնիկա է ձեռք բերել Չինաստանից առանց հաշիվ ֆակտուրաների կամ այլ թղթերի, այնուհետև վաճառել Հայաստանում՝ դուրս գրելով հաշիվ վավերագիր ֆիզ անձին։ Եռամսյակային հաշվետվության ժամանակ ներկայացրել եմ վաճառքի այդ գումարը և վճարել համապատասխան հարկերը։ Հարցս հետևյալն է․ արդյո՞ք խնդիրներ կունենամ, եթե չունեմ ձեռքբերումը փաստող թղթեր, և ինչպե՞ս այսուհետ դա կազմակերպեմ։

Արմեն․

Բարև ձեզ, ԱՁ-ն աշխատում է շրջանառության հարկման դաշտում, և ոչ ռեզիդենտին ծառայություններ մատուցելու դեպքում նրանից եկամուտ ստանալուց առաջ ենթակա է շահութահարկի պահում: Ո՞ր ձևով պետք է ներկայացնել հաշվետվությունը, և արդյո՞ք այդ դեպքում պարտադիր է գրել ինքնահաշիվ։

Նանար․

Բարև ձեզ։

Շրջանառության հարկով հարկվող արտադրությամբ զբաղվող ԱՁ-ն ձեռք է բերել ապրանք առանց ՀԴՄ կտրոնի ու հաշիվ վավերագրի։ Ինչպե՞ս պետք է ձևակերպվի գնումը։ Շնորհակալություն։

Արման․

Հարգելի գործընկերներ, եթե շրջանառության հարկով աշխատող կազմակերպությունը մատուցում է ծառայություններ այլ կազմակերպության ԱԱՀ-ից ազատված ծրագրի շրջանակներում (պատվիրատուն տրամադրում է տեղեկանք ԱԱՀ-ից ազատված լինելու մասին), ապա շրջանառության հարկ վճարող համարվող կատարող կազմակերպությունը, երբ ապրանքներ/ծառայություններ է ձեռք բերում ԱԱՀ վճարող համարվող վաճառողներից (նույն ծրագրի շրջանակներում իր մատուցվող ծառայություններում օգտագործելու համար), կարո՞ղ է այդ տեղեկանքը ներկայացնելով՝ այդ ապրանքները/ծառայությունները ստանա առանց ԱԱՀ-ի, թե՞ պետք է ինքն էլ համարվի ԱԱՀ վճարող։

Աննա․

Բարև Ձեզ։ Հարցս այսպիսին է․ ՍՊԸ-ն ընդհանրապես գործունեություն չի իրականացրել, չի ստացել հաշիվներ, դուրս չի գրել: Եվ զուգահեռ հիմանդիրն ունի Ա/Ձ-ը, որը նույնպես գործունեություն չի իրականացրել, միայն ունի ստացված հաշիվներ՝ ինտերնետ ծառայությունների։

Հարց 1․ Կարո՞ղ եմ ՍՊԸ-ի գործունեությունը դադարեցնել և 2025-ից աշխատել Ա/Ձ-ով շրջ․ հարկի դաշտում։

Հարց 2․ Արդյո՞ք քանի որ ՍՊԸ-ն գրանցել է 2020թ-ին, պետք է նրա համար 0-ական հաշվետվություններ ներկայացնել։ Եվ Ա/Ձ-ի մասով նույնպե՞ս անհրաժեշտ է ներկայացնել հաշվետվություններ (կային ստացված հաշիվներ), թե՞ կարող եմ տալ շրջանառության հարկ վճարող համարվելու մասին հայտարարություն և սկսեմ գործունեությունս։

Անչափ շնորհակալ կլինեմ արձագանքելու համար։

Լևոն․

Որևէ մեկը տեղեկություն ունի՞, թե արդյո՞ք ՏՏ ոլորտի ծառայություններ մատուցող ԱՁ-ն 2025 թվականից 1% շրջանառության հարկ պետք է վճարի։

Ելենա․

Բարև Ձեզ։ ՍՊԸ-ն աշխատում է շրջհակով, ունի իր հաշվեկշռում շենք, որի արժեքը կանոնադրական կապիտալում գրանցված է 30 մլն․ դրամ (30 տարի առաջ գնման արժեքն է)։ Կադաստրային արժեքը այս պահին կազմում է 200 մլն․ դրամ։ ՍՊԸ-ն ցանկանում է օտարել 100% բաժնեմասը այլ ֆիզանձի։ Ինչպիսի՞ հարկեր կառաջանան, եթե բաժնեմասի արժեքը կազմի 200 մլն․ դրամ։ Կանխավ շնորհակալ եմ պատասխանի համար։

Գևորգ․

Հարգելի հաշվապահներ, արդյո՞ք ճիշտ եմ կատարել հաշվարկը: Կազմակերպությունը 11.08.2022-ին շրջանառության հարկի համակարգից անցել է ընդհանուր հարկման համակարգ: 19.04.2022-ին ձեռք է բերել հիմնական միջոց 30 մլն դրամ արժողությամբ, 8 տարի (96 ամիս) օգտակար ծառայության ժամկետով: Համաձայն հարկային օրենսգրքի 264-րդ հոդվածի ընդհանուր հարկման կարգում մաշվածությունը կսկսվի հաշվարկվել 01.09.2022-ից, հիմնական միջոցի հաշվեկշռային արժեքը կլինի 28 626 712 դրամ, օգտակար ծառայության մնացորդային ժամկետը՝ 92 ամիս:

Դիանա․

Բարև ձեզ։ Խնդրում եմ ասել․ ԱՁ, ով աշխատում է շրջհարկով, ինչ հաշվետվություններ է անհրաժեշտ հանձնել սարքավորում ներմուծելու համար։ Պարտադի՞ր է, որ հարկման ռեժիմը փոխվի ընդհանուր հարկման դաշտ, որ կարողանանք ներմուծել։ Եվ ներմուծման հայտարարագիր և հայտարարություն է՞լ պիտի հանձնենք։ Արտադրության համար է անհրաժեշտ սարքավորումը, ոչ թե վաճառքի: Կանխավ շնորհակալություն:

Մարիամ․

2025թ-ից ատամնաբուժական ծառայություններ մատուցող կազմակերպությունը կարո՞ղ է շարունակել աշխատել շրջանառության հարկով։ Թե՞ որպես բժշկական հաստատություն անցնում է ընդհանուր հարկման դաշտ։

Հայկ․

Բարև Ձեզ։ 2025 թվականից շրջանառության հարկ վճարողները եթե հաշվարկային փաստաթղթով կամ ՀԴՄ-ով ձեռքբերում չեն կատարում, պե՞տք է 20 տոկոս եկամտային հարկ վճարեն։ 2025 թվականից շրջանառության հարկ վճարողները պե՞տք է պահեն պահեստի մնացորդ։ Կխնդրեի օրենքի հղումը ուղարկեք։

Տիգրան․

Ողջույն, հարգելի գործընկերներ, մի քանի հարց ունեմ համատրիությունների գործունեության հետ կապված․

1․ Արդյո՞ք համատիրությունները չեն կարող աշխատել շրջանառության հարկով

2․ Եթե պարտադիր ընդհանուր հարկման համակարգում է գործելու, ապա իրավաբանական անձանցից անդամավճար ստանալու համար պե՞տք է հարկային հաշիվ գրել և ԱԱՀ վճարել, թե՞ հաշիվ վավաերագիր

3. Իրավաբանական անձանց մասով դուրս գրված հաշիվներից առաջանու՞մ է շահութահարկ

Հովհաննես․

Հարգելի հաշվապահներ, խնդրում եմ պարզաբանեք․

1․ Արտադրական գործունեությունից ստացվող եկամուտներից արդյո՞ք նվազեցվում է տարածքի (արտադրամասի) վարձակալության վճարը (վարձակալությունը ստանում ենք կազմակերպությունից, և առկա է հաշիվ վավերագիր)

2․ Պետական աջակցության ենթակա գործունեության տեսակներով զբաղվող տնտեսվարող սուբյեկտները 01․01․2025-ից շարունակու՞մ են վճարել 5% շրջանառության հարկ, անկախ այն փաստից հարկային արտոնություններից օգտվելու հավաստագիր ստացել են, թե ոչ

3․ Այլ գործունեությունից ստացվող եկամուտներից նվազեցվում են անմիջականորեն կապված ծախսեր, եթե այդ ծախսերը կատարվում են ՀՀ-ից դուրս, և առկա չէ հաշիվ վավերագիր

Կանխավ շնորհակալություն։